ELOKSİZİN

ELOKSİZİN örtüklü tabletlər
ELOXYZINE

Beynəlxalq patentləşdirilməmiş adı: HYDROXYZİNE

Tərkibi
Təsiredici maddə: 1 örtüklü tabletin tərkibində 25 mq hidroksizin hidroxlorid vardır:
Köməkçi maddələr: Mikrokristalik sellüloza, iki əsaslı kalsium fosfat, laktoza, nişasta, nişasta natrium qlikolat, maqnezium stearat, kroskarmelloza natrium, IPA, metilen dixlorid, hidroksipropil metil sellüloza, polietilen qlikol və titan dioksid.

Təsviri
Bölmək üçün hər iki tərəfdən kəsici xətti olan ağ rəngli, yuvarlaq, örtüklü tabletlər.

Farmakoterapevtik qrupu
Sinir sistemi xəstəliklərinin müalicəsi üçün preparatlar. Psixotrop preparatlar. Anksiolitik. Difenilmetan törəmələri.

ATC kodu:N05BB01.

Farmakoloji xüsusuiyyətləri
Farmakodinamikası
Difenilmetan törəməsidir, orta dərəcədə anksiolitik aktivliyə malikdir; həmçinin sakitləşdirici, qusma əleyhinə, antihistamin və M-xolinoblokadaedici təsirlər göstərir. Hidroksizin hematoensefalik baryerdən yaxşı keçir, yüksək oxşarlığı (affinliyi) olan beyin reseptorları ilə birləşərək, sedativ və anksiolitik effekti təmin edir. Antihistamin və bronxgenişləndirici təsiri tədqiqatlarda nümayiş etdirilmiş və klinik olaraq təsdiqlənmişdir. Qusmaəleyhinə effekti apomorfin və veriloid istifadəli testlərdə təqdim edilmişdir. Farmakoloji və klinik araşdırmalar göstərdi ki, hidroksizin terapevtik dozalarda mədə şirəsi ifrazını və ya turşuluğunu artırmır, əksər hallarda isə zəif antisekretor təsir göstərir. Hidroksizin həmçinin övrə, ekzema və dermatit zamanı qaşınmanı yüngülləşdirir. Antihistamin təsiri daxilə qəbuldan təxminən 1 saat sonra başlayır. Sedativ effekti tabletin qəbulundan 30-45 dəqiqə sonra özünü göstərir. Hidroksizinin istifadəsi fonunda birdəfəlik və ya təkrar 50 mq doza qəbulundan sonra yuxu müddətinin uzanması, gecə oyanmalarının tezliyinin azalması müşahidə olunur. Əzələ gərginliyinin azalması preparatın gündə 3 dəfə 50 mq doza qəbulu zamanı qeyd edilmişdir. Psixi asılılıq və asılılıq yaratmır. Uzunmüddətli qəbul zamanı kəsilmə sindromu və koqnitiv funksiyalarının pisləşməsi qeyd olunmayıb.

Farmakokinetikası
Mədə-bağırsaq sistemindən sürətlə sorulur. Peroral qəbuldan sonra maksimal konsentrasiyaya (Cmax) çatma müddəti 2 saatdır. Böyüklərdə 25 mq birdəfəlik dozanın qəbulundan sonra Cmax 30 mq/ml, 50 mq hidroksizinin qəbulundan sonra isə Cmax 70 mq/ml təşkil edir. Daxilə qəbuldan sonra biomənimsənilməsi 80% təşkil edir. Hidroksizin plazmadan çox dəridə konsentrasiya olunur. Paylanma əmsalı böyüklərdə 7-16 l/kq təşkil edir. Hidroksizin hematoensefalik baryerdən və ciftdən keçir və ana toxumalarından çox döl toxumalarında toplanır. Hidroksizin qaraciyərdə metabolizə olunur. Metabolitlər ana südündə aşkar olunur. Əsas metaboliti – H1-blokator olan Setirizindir (45%). Ümumi klirensi 13 ml/dəq/kq təşkil edir. Hidroksizinin yalnız 0,8%-i dəyişməz halda böyrəklər vasitəsilə xaric edilir. Uşaqlarda ümumi klirensi böyüklərə nisbətən 4 dəfə qısadır. Yarımxaricolma dövrü (T1/2) 14 yaşlı uşaqlarda 11 saat, 1 yaşlı uşaqlarda 4 saat, böyüklərdə isə yarımxaricolma dövrü 14 saat təşkil edir.
Yaşlı xəstələrdə T 1/2 29 saat, paylanma həcmi 22,5 l/kq təşkil edir. Qaraciyər xəstəliyi olan pasiyentlərdə yarımxaricolma dövrünün 37 saata qədər artması səbəbilə gündəlik dozanı və ya qəbulların sayını azaltmaq lazımdır.

İstifadəsinə göstərişlər
• Böyüklərdə həyacan hissinin simptomatik müalicəsi.
• Premedikasiya məqsədi ilə allergik mənşəli dəri qaşınması simptomatik müalicəsi.

Əks göstərişlər
• Anamnezdə hidroksizinə və ya preparatın tərkibində olan hər hansı komponentə qarşı, setirizinə və piperazinin digər törəmələrinə, aminofillinə və ya etilendiaminə qarşı yüksək həssaslıq.
• Porfiriya xəstəliyiyindən əziyyət çəkən pasiyentlər
• QT intervalının qazanılmış və ya anadangəlmə uzanması olan pasiyentlər.
• Hamiləlik və laktasiya dövrləri.
• 12 aylığa qədər uşaqlar.
Xüsusi göstərişlər və ehtiyat tədbirləri
Kardiovaskulyar effekt
Hidroksizin qəbul edən pasiyentlərdə elektrokardioqrammada QT intervalının uzanması halları müşahidə edilmişdir. Bu pasiyentlərin əksəriyyətində buna səbəb ola biləcək digər risk faktorları, elektrolit pozğunluqları və eyni vaxtda qəbul edilən dərmanlar olmuşdur. Hidroksizin ən aşağı effektiv dozada və mümkün olan ən qısa müddətdə istifadə edilməlidir. Ürək aritmiyasına, elektrolit balansının pozulmasına (hipokalemiya, hipomaqnezemiya), əvvəllər ürək xəstəliyi olan və ya potensial aritmogen dərmanlarla eyni vaxtda müalicə alan pasiyentlərdə ehtiyatlı olmaq lazımdır. Bu pasiyentlərdə alternativ müalicə üsulları nəzərdən keçirilməlidir. Ürək aritmiyası ilə əlaqəli ola biləcək əlamətlər və ya simptomlar görünərsə, hidroksizin ilə müalicə dayandırılmalı və pasiyentlər dərhal həkimə müraciət etməlidirlər. Xəstələrə hər hansı ürək simptomları barədə dərhal məlumat vermələri tövsiyə edilməlidir.
Qaraciyər çatışmazlığı olan pasiyentlər
Qaraciyər çatışmazlığı olan pasiyentlər üçün doza azaldılmalıdır. Müntəzəm olaraq hidroksizin qəbul edən qaraciyər çatışmazlığı olan pasiyentlərdə qaraciyər funksiyasına nəzarət edilməlidir.
Böyrək çatışmazlığı olan xəstələr
Orta və ağır dərəcəli böyrək çatışmazlığı olan xpasiyentlərdə hidroksizin ehtiyatla istifadə edilməli və doza azaldılmalıdır.
Yaşlı xəstələrdə istifadə
Daha cavan pasiyentlərlə müqayisədə yaşlı şəxslərdə hidroksizinin xaric olmasının azalması və əlavə təsirlərin riskinin daha yüksək olması (məsələn, antixolinergik effektlər) səbəbindən yaşlı pasiyentlər üçün tövsiyə edilmir.
Potensial antixolinergik təsirlərə görə hidroksizin qlaukoma, sidik yollarının obstruksiyası, mədə-bağırsaq traktının hərəkətliliyinin azalması, ağır miasteniya və ya demensiyası olan pasiyentlərdə ehtiyatla istifadə edilməlidir.
Hidroksizin qıcolma riski yüksək olan pasiyentlərdə ehtiyatla istifadə edilməlidir.
Kiçik yaşlı uşaqlar mərkəzi sinir sistemi ilə əlaqəli mənfi hadisələrin inkişafına daha çox həssasdırlar. Uşaqlarda qıcolmaların böyüklərə nisbətən daha tez-tez olduğu bildirilmişdir.
Hidroksizin mərkəzi sinir sistemini ləngidən və ya antixolinergik xüsusiyyətlərə malik dərmanlarla eyni vaxtda istifadə edildikdə, dozanın tənzimlənməsi tələb oluna bilər.
Alkoqol və hidroksizinin eyni vaxtda istifadəsindən çəkinmək lazımdır. Alkoqol hidroksizinin effektini gücləndirir.
Test nəticələrinə müdaxilə etməmək üçün müalicə allergiya və ya metaxolin ilə təxribatçı ağciyər testindən ən azı 5 gün əvvəl dayandırılmalıdır. Yüksək dozalar qəbul edərkən ağızda quruluq yarana bilər, ona görə də pasiyentlər bu risk barədə məlumatlandırılmalı və ağız və diş gigiyenasına düzgün riayət olunmalıdır. Hidroksizin insult üçün risk faktorları olan pasiyentlərdə ehtiyatla istifadə edilməlidir.
Qalaktoza dözümsüzlüyü, ümumi laktaza çatışmazlığı və ya qlükoza-qalaktoza malabsorbsiyası kimi nadir irsi problemləri olan xəstələr bu dərmanı qəbul etməməlidirlər.

Digər dərman vasitələri ilə qarşılıqlı təsiri
Hidroksizinin QT intervalını uzadan və/və ya piruet mədəcik taxikardiyasını yaradan dərmanlarla, məs., IA sinifindən olan antiaritmik preparatlar (məs., xinidin, disopiramid) və III antiaritmik preparatlar (məs., amiodaron, sotalol), bəzi antihistamin vasitələr, bəzi neyroleptiklər (məs., haloperidol), bəzi antidepresanlar (məs., sitalopram, essitalopram), bəzi malyariya əleyhinə preparatlar (məs., mefloksin), bəzi antibiotiklər (məs., eritromisin, levofloksasin, moksifloksasin), bəzi antifunqal vasitələr (məs., pentamidin), bəzi mədə-bağırsaq dərmanları (məs., prukaloprid), xərçəngəleyhinə istifadə olunan bəzi dərmanlar (məsələn, toremifen, vandetanib), metadon ilə eyni vaxtda istifadəsi ürək aritmiyası riskini artırır. Bu səbəbdən bu preparatların kombinasiyası əks göstərişdir.
Narkotik analgetiklər, barbituratlar, trankvilizatorlar, yuxugətirici vasitələr, antixolinergik preparatlar kimi mərkəzi sinir sistemini ləngidən dərman preparatları ilə birgə təyin edildikdə Eloksizinin qarşılıqlı gücləndirici təsirini nəzərə almaq lazımdır. Bu halda onların doza həddi fərdi şəkildə muəyyən edilməlidir.
Hidroksizin betahistinin və antixolinesteraz preparatların antoqonisti kimi təsir göstərir.
Monoaminooksidazanın inhibitorları ilə birgə istifadədən qaçmaq lazımdır.
Preparat adrenalinin vazokonstriktor təsirinin və fenitoinin qıcolmaəleyhinə təsirinin qarşısını alır.
Hidroksizin qaraciyərdə alkoldehidrogenaza və CYP3A4/5 sistemi vasitəsi ilə metabolizə olunduğu üçün, qaraciyər fermentlərinin güclü inhibitorları kimi tanınan dərman preparatları ilə birgə istifadəsi zamanı hidroksizinin qan plazmasında konsentrasiyasının artması gözlənilir.
Bradikardiya və hipokaliyemiyaya səbəb olan dərmanlarla birlikdə istifadə zamanı ehtiyatlı olun.
Hidroksizin CYP2D6 (Ki: 3,9 mkM: 1,7 mkq/ml) inhibitorudur və hidroksizinin yüksək dozalarda istifadəsi zamanı CYP2D6 substratları ilə (məs., beta blokatorlar, antidepressantlar, neyroleptiklər ) qarşılıqlı təsir baş verə bilər.

Hamiləlik və laktasiya dövründə istifadəsi
Hamiləlik dövrü
Hamilə qadınlarda hidroksizinin istifadəsi ilə bağlı etibarlı məlumatlar yoxdur. Hidroksizin plasental baryeri keçdiyi üçün, ana ilə müqayisədə döldə daha yüksək konsentrasiyada olur. Heyvanlar üzərində aparılan tədqiqatlar reproduktiv toksikliyi göstərmişdir. Bu səbəbdən hidroksizinin hamiləlik dövründə istifadəsi əks göstərişdir.
Laktasiya dövrü
Hidroksizinin əsas metaboliti olan hidroksizin hidroxlorid ana südü ilə xaric olur. Hidroksizinin ana südü ilə ifrazı ilə bağlı heç bir rəsmi tədqiqat aparılmasa da, hidroksizin qəbul edən qadınların ana südü ilə qidalanan yenidoğulmuşlarda ciddi arzuolunmaz təsirlər müşahidə edilmişdir. Buna görə də, laktasiya dövründə hidroksizin əks göstərişdir. Əgər hidroksizinlə müalicəyə ehtiyac olarsa, ana südü ilə qidalandırmanı dayandırmaq lazımdır.

Pediatriyada istifadəsi
Hidroksizin 12 ayadək uşaqlara istifadə edilməməlidir.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
Hidroksizin diqqəti toplama qabiliyyətininə və psixomotor reaksiyaların sürətinə təsir göstərə bilər. Eloksizin qəbul edən pasiyentlər bu ehtimal barədə xəbərdarlıq edilməli və avtomobil idarə etməkdən və ya xüsusi diqqət tələb edən mexanizmlərlə işləməkdən çəkinməlidirlər.

İstifadə qaydası və dozası
Dərman daxilə qəbul edilir. Bir tablet ayırıcı zolaqla ikiyə bölünür və həkimin təyinatı üzrə uşağın çəkisindən asılı olaraq bir neçə dəfəyə qəbul oluna bilər. Təyin olunmuş dozanın əzilib su ilə qarışdırılması məsləhət görülür.

Qaşınmanın simptomatik müalicəsi
12 aydan 6 yaşa qədər uşaqlara: Gündəlik doza 1-2.5 mq/kq, bir neçə qəbula.
6 yaşdan yuxarı uşaqlara: Gündəlik doza 1-2.5 mq/kq, bir neçə qəbula
Böyüklərə: Başlanğıc doza 25 mq təşkil edir, zəruri hallarda doza 4 dəfə artırıla bilər (25 mq-dan gündə 4 dəfə).

Premedikasiya
Uşaqlara: Əməliyyatdan 1 saat əvvəl və əlavə olaraq əməliyyatdan əvvəlki gecə 1 mq/kq dozada.

Həyacan hissinin simptomatik müalicəsi
Böyüklərə: Gündəlik doza 25-100 mq təşkil edir. Gündəlik doza gecə və ya gün ərzində ayrı-ayrı dozalara bölməklə təyin olunur.
Orta günlük doza 50 mq (səhər 12,5 mq, günorta 12,5 mq və gecə 25 mq) təşkil edir. Lazım olarsa, gündəlik doza 300 mq-a qədər artırıla bilər.

Maksimal birdəfəlik doza 200 mq-ı keçməməlidir.
Maksimal gündəlik doza 300 mq-dan çox olmamalıdır.
Dozanın tənzimlənməsi
Doza pasiyentin müalicəyə reaksiyasına uyğun olaraq verilmiş doza diapazonunda tənzimlənməlidir.
Ayrı-ayrı pasiyent qrupları
Məsləhət görülən dozalar diapazonunda aparılan müalicəyə cavabı nəzərə alaraq doza fərdi olaraq həkim tərəfindən təyin edilir.
Yaşlı pasiyentlər: Preparatın uzunmüddətli təsiri ilə əlaqədar yaşlı şəxslərə müalicəni tövsiyə olunan dozanın yarısından başlamaq lazımdır. Yaşlı xəstələrin müalicəsində mümkün olan ən aşağı doza seçilməlidir. Yaşlılarda maksimal gündəlik doza 50 mq/gün təşkil edir. Nəticələr və müalicə ehtiyacı davamlı olaraq qiymətləndirilməlidir.
Böyrək çatışmazlığı olan xəstələr: Setirizin metaboliti ifrazının azalması səbəbi ilə əlaqədar orta və ağır böyrək çatışmazlığı olan pasiyentərdə doza azaldılmalıdır.
Qaraciyər çatışmazlığı olan xəstələr: Qaraciyər çatışmazlığı olan pasiyentlərdə gündəlik dozanın 33% azaldılması tövsiyə olunur.

Əlavə təsirləri
Əlavə təsirlər əksər hallarda MSS-nin (mərkəzi sinir sistemi) funksiyasının ləngiməsi ilə müşahidə olunur (yüngül yuxululuqdan dərin yuxuya qədər dəyişməsi, həmçinin yorğunluq, başgicəllənmə və koordinasiyanın pozulması). Bəzən paradoksal stimullaşdırma baş verə bilər, xüsusən uşaqlarda və yaşlılarda yüksək dozanın istifadəsi zamanı. Sedativ təsirlər baş verərsə, müalicə başladıqdan bir neçə gün sonra azala bilər. Digər əlavə təsirlərdən antixolinergk aktivlik, yüksək həssaslıq reaksiyaları, baş ağrısı, psixomotor pozğunluqlar və antimuskarinik effektlər də müşahidə oluna bilər.
Əlavə təsirlərin tezlik parametrləri aşağıdakı şəkildə müəyyən olunur: çox tez-tez (≥ 1/10); tez-tez (≥ 1/100- < 1/10); bəzən (≥ 1/1000- < 1/100); nadir (≥ 1/10000- < 1/1000); çox nadir (< 1/10000); tezliyi məlum deyil (əldə olunan məlumatlar əsasında qiymətləndirilməsi mümkün deyil).
Qan və limfa sistemdə baş verən pozğunluqlar: Tezliyi məlum deyil: Trombositopeniya.
İmmun sistemdə baş verən pozğunluqlar: Nadir (≥1/10,000 - <1/1,000): Yüksək həssaslıq reaksiyaları.Çox nadir (<1/10,000): Anafilaktik şok.
Psixi pozğunluqlar: Bəzən (≥ 1/1000, lakin < 1/100): Həyəcan, çaşqınlıq.Nadir (≥ 1/10000, lakin < 1/1000): Dezorentasiya, hallüsinasiya.Tezliyi məlum deyil: Aqressiya, depressiya, tiklər
Sinir sisteminin pozğunluqları: Bəzən (≥ 1/1000, lakin < 1/100): Sedativ.Tez-tez (≥ 1/100- < 1/10): Başgicəllənmə, yuxusuzluq, tremor.Nadir (≥ 1/10000- < 1/1000): Tutmalar, diskineziya. Tezliyi məlum deyil: Distoniya, paresteziya.
Görmə funksiyalarında dəyişikliklər: Nadir (≥ 1/10000- < 1/1000): akkomodasiyanın pozulması, bulanıq görmə.Tezliyiməlum deyil: Görmə qabiliyyətinin zəifləməsi
Ürək pozğunluqları: Nadir (≥ 1/10000- < 1/1000): ürəyin dayanması, mədəciklərin fibrilasiyası, mədəcik taxikardiyası.Tezliyi məlum deyil: mədəcik aritmiyaları (məsələn, Torsade de Pointes), QT intervalının uzanması.
Damar pozğunluqları: Nadir (≥ 1/10000- < 1/1000): Hipotenziya.
Tənəffüs, döş qəfəsi və mediastinal pozğunluqlar: Çox nadir (< 1/10000): Bronxospazm.
Mədə-bağırsaq pozğunluqları: Bəzən (≥ 1/1000, lakin < 1/100): Ürəkbulanma.Nadir (≥ 1/10000- < 1/1000): Qəbizlik, qusma.Tezliyi məlum deyil: İshal.
Hepatobiliar pozğunluqlar: Nadir (≥ 1/10000- < 1/1000): Qaraciyər funksiyası testlərinin pozulması.Tezliyi məlum deyil: Hepatit
Dəri və dərialtı toxumalar tərəfindən olan pozğunluqlar: Nadir (≥ 1/10000- < 1/1000): Qaşınma, eritema, papulyoz səpgi, məxmərək, dermatit.
Çox nadir (< 1/10000): Angioödem, tərləmənin artması, fiksəolunmuş dərman səpgisi, kəskin generalizəolunmuş ekzantematoz pustulyoz (AGEP), multiformalı eritema, Stevens-Johnson sindromu.
Böyrək və sidikçıxarıcı yolların pozğunluqlar:ı Nadir (≥ 1/10000- < 1/1000): Sidik ifrazının gecikməsi.Tezliyi məlum deyil: Dizuriya, enurez

Doza həddinin aşılması
Simptomları: Doza həddinin aşılması çox yüksək olarsa, müşahidə olunan simptomlar əsasən güclü antixolinergik təsirlər, MSS depressiyası və ya MSS-nin paradoksal stimullaşdırılması ilə əlaqələndirilir. Bu simptomlara ürəkbulanma, qusma, taxikardiya, qızdırma, yuxululuq, bəbək refleksinin pozulması, tremor, çaşqınlıq və ya halyusinasiyalar daxildir. Onlar şüurun və tənəffüsün ləngiməsi, konvulsiyalar və ya arterial təzyiqin düşməsi ilə müşayiət oluna bilər. Neyroleptiklərin həddindən artıq yüksək dozası ilə əlaqədar olaraq QT intervalının uzanması və ciddi aritmiya baş verə bilər.
Müalicəsi: Spontan qusma olmadıqda, qusmanı süni şəkildə yaratmaq və ya mədəni yumaq lazımdır. Orqanizmin həyati vacib funksiyalarını saxlamağa yönəlmiş ümumi tədbirlər həyata keçirirlər və növbəti 24 saat ərzində intoksikasiya əlamətləri yox olana qədər xəstənin vəziyyəti izlənilir, ürəyin fəaliyyətinə və arterial təzyiqə nəzarət olunur. EKQ-nin monitorinqi vasitəsilə tənəffüs yollarının, tənəffüs və qan dövranının vəziyyətinə nəzarət etmək, adekvat oksigenasiyanı təmin etmək lazımdır. Vazopressor effekti əldə etmək lazım gələrsə, noradrenalin və ya metaramenol təyin edilir. Adrenalin təyin etmək tövsiyə olunmur, çünki qan təzyiqini daha da aşağı sala bilər. Spesifik antidotu yoxdur. Hemodializ effektiv deyil.

Buraxılış forması 10 tablet bir ALU-PVC blisterdə, 20 blister içlik vərəqə ilə birlikdə karton qutuya qablaşdırılır (qutuda 200 tablet).
Saxlanma şəraiti
25°C-dən yüksək olmayan temperaturda, sərin, quru və uşaqların əli çatmayan yerdə saxlamaq lazımdır. İşıqdan qoruyun və qutusunda saxlayın.
Yararlılıq müddəti
36 ay.
Yararlılıq müddəti bitdikdən sonra istifadə etmək olmaz.

Aptekdən buraxılma şərti
Resept əsasında buraxılır.

İstehsalçı/Qeydiyyat vəsiqəsinin sahibi
Centurion Healthcare Pvt Ltd

Eksklüziv distribyutor
EL Kompaniya MMC.