TOSEF
TOSEF 100 mq/5 ml pediatrik oral suspenziya hazırlamaq üçün toz
TOCEF
Beynəlxalq patentləşdirilməmiş adı: Cefixime trihydrate
Tərkibi
Təsiredici maddə: 5 ml (1 qaşıq) hazır suspenziyanın tərkibində 111,92 mq (100 mq sefiksimə
ekvivalent) sefiksim trihidrat vardır.
Köməkçi maddələr: sukroza, ksantan qətranı, natrium benzoat, moruq aromatizatoru, kolloidal
silisium dioksid.
Təsviri
Ağ və ya ağımtıl toz, hazırlandıqdan sonra ağ rəngdən ağımtıl rəngə qədər dəyişə bilən, moruq ətirli suspenziyadır.
Farmakoterapevtik qrupu
Oral sefalosporinlər.
ATC kodu: J01DD08.
Farmakoloji xüsusiyyətləri
Farmakodinamikası
Təsir mexanizmi
Ağızdan qəbul edilən sefalosporin olan sefiksim, quruluşca, spektr və beta-laktamaza rezistentliyinə görə parenteral sefalosporinə: sefotaksim-ə bənzəyir. Sefiksim də bu molekul qrupunun bütün üzvləri kimi bakterisid effektə malikdir. Sefiksim bakteriyaların hüceyrə divarının sintezini inhibə edərək təsir göstərir.
Beta-laktamaz fermentlərinə çox davamlıdır. Buna görə, beta-laktamazanın mövcudluğu səbəbindən penisillinlərə davamlı mikroorqanizmlərə və bəzi sefalosporinlərə davamlı olan bəzi mikroorqanizmlərə qarşı effektivdir.
Sefiksim bu patogenlərə qarşı effektivdir: Streptococcus рneumoniae, Streptococcus pyogenes, Haemophilus influenzae, Moraxella catarrhalis, Neisseria gonorrhoeae, Escherichia coli, Proteus mirabilis, Klebsiella pneumoniae, Klebsiella oxytoca.
Rezistent mikroorqanizmlər
Pseudomonas spp., enterococci, Listeria monocytogenes, əksər Staphylococci (koaqulaza pozitiv və neqativ ştamlar, həmçinin metisillin rezistent ştamlar), əksər Enterobacter ştamları, Bacteroides fragilis ştamları və Clostridium spp. sefiksimə qarşı rezistentdirlər.
Farmakokinetikası
Absorbsiyası
Daxilə qəbul edildikdə sefiksim asanlıqla sorulur. Qidanın olması absorbsiyaya təsir etmir.
Paylanması
200 mq-dan 2000 mq-a qədər dəyişən dozalarda qan plazmasında pik konsentrasiya və zərdab konsentrasiyalarının əyri altı sahəsi (AUC) xətti yüksəliş nümayiş etdirir.
200 mq və 400 mq dozaların daxilə qəbulundan sonra 3-4 saat sonra zərdabda pik konsentrasiyalar müvafiq olaraq, 2-4 µq/ml və 3-5µq/ml təşkil edir. Təkrar dozalarda, dərman zərdabda və ya sidikdə toplanmır. Plazma zülalları ilə birləşmə 65% olmuşdur; sağlam subyektlərdə, plazmadan yarımxaricolma dövrü 3-4 saat təşkil edir.
Biotransformasiyası
Sefiksim in vivo metabolizə olunmur.
Eliminasiyası
Absorbsiya olunmuş dozanın təxminən 50%-i 24 saat ərzində dəyişməz olaraq sidiklə xaric olunur. Qəbul edilmiş dozanın 10%-i öd ilə xaric olur. Böyrək funksiyası orta dərəcədə pozulmuş xəstələrdə (kreatinin klirensi 20-40 ml/dəq) sefiksimin zərdabdan yarımxaricolma dövrü 6,4 saat, ağır böyrək çatışmazlığında (kreatinin klirensi 5-20 ml/dəq) isə 11,5 saata qədər uzanır.
Pasiyentlərdə xüsusiyyətləri
Yaşlılar
Yaş dərman vasitəsinin farmakokinetik xüsusiyyətlərinə əhəmiyyətli dərəcədə təsir göstərmir.
Böyrək çatışmazlığı
Dərman vasitəsi hemodializ və ya peritoneal dializ yolu ilə əhəmiyyətli dərəcədə qan axınından xaric olunmur.
Klinikayaqədərki təhlükəsizlik məlumatları
Təkrar qəbulundan sonra toksiklik üzrə tədqiqatlar mədə-bağırsaq sistemində və böyrəklərdə maddə ilə əlaqəli təsirləri nümayiş etdirdi. Sefiksim, digər sefalosporinlər kimi, potensial nefrotoksik dərman kimi təsnif edilir.
Üç həftəlik itlərdə 5 həftə ərzində gündə 400 mq/kq sefiksimin gündəlik daxilə qəbulu böyrək borucuq epitelisinin təsadüfi nekrozuna səbəb oldu. Qeyri-toksik doza bu tədqiqatda 100 mq/kq/gün təyin edilmişdir ki, bu da terapevtik dozadan təxminən on beş dəfə çox hesab edilir. Yetkin itlərdə nefrotoksikliyin histoloji əlamətləri 1 q//kq/gün sefiksimin 14 günlük venadaxili istifadəsindən sonra müşahidə edildi (əvvəlki nekrozdan sonra böyrək borularının regenerasiyası).
Siçovullarda bir il ərzində gündə 1 q/kq dozanın qəbulu böyrək çəkisinin artması və proteinuriya ilə müşayiət olunan xroniki nefropatiyaya gətirib çıxardı. Təsvir edilən yeganə əlavə məlumat antibiotiklər üçün xarakter olan bağırsağın böyüməsi idi.
Dovşanlarda sefiksim hətta aşağı dozalarda da toksiki təsir göstərir. Bu, ilk növbədə növə xas qram-müsbət bağırsaq florasının zədələnməsi ilə əlaqəli olmuşdur.
Siçovullar və dovşanlar üçün bir və ya bir neçə parenteral istifadədən sonra proksimal böyrək borularına toksik təsir üçün təxminən 500 mq/kq/gün həddində doza müəyyən edilmişdir. 12 mq/kq/gün effektiv doza ilə terapevtik spektr genişdir.
Üç heyvan növü (siçovul, siçan, dovşan) üzərində aparılan tədqiqatlar teratogen xüsusiyyətlərə dair heç bir sübut göstərməmişdir. Siçovullarda perinatal və ya postnatal inkişafa və fertilliyə təsiri müşahidə edilməmişdir.
Sefiksim plasentadan keçir. Göbək ciyəsi qanındakı konsentrasiyalar ananın plazma konsentrasiyasının 1/6-1/2-ni təşkil edir. Ana südündə sefiksimin konsentrasiyası sübut edilməmişdir. Hamiləlik və laktasiya dövründə insanlarda istifadəsi ilə bağlı yalnız məhdud təcrübə mövcuddur.
Bir neçə in vitro və in vivo mutagenlik sınaqları mənfi nəticə verdi. Buna görə insanlarda sefiksimin mutagen təsirini təhlükəsiz kimi istisna etmək olar.
İstifadəsinə göstərişlər
Tosef aşağıdakı infeksiyalara qarşı effektivdir:
Kəskin orta otit; Streptococcus рneumoniae, Haemophilus influenzae və Moraxella catarrhalis tərəfindən törədilən
Kəskin sinusit; Streptococcus pneumoniae, Haemophilus influenzae, Moraxella catarrhalis tərəfindən törədilən
Kəskin tonzillofaringit və ya faringit: Antibakterial terapiya yalnız Streptococcus pyogenes tərəfindən törədildiyi halda göstərişdir
Xroniki bronxitin kəskinləşməsi yalnız Streptococcus рneumoniae və Haemophilus influenzae tərəfindən törədildiyi halda
Ağırlaşmamış sidik traktı infeksiyaları
Ağırlaşmamış süzənək
Əks göstərişlər
Sefiksimə, digər sefalosporin antibiotiklərə və ya dərman vasitəsinin tərkibinə daxil olan digər komponentlərə qarşı məlum hiperhəssaslığı olan pasiyentlərə istifadəsi əks göstərişdir.
Xüsusi göstərişlər və ehtiyat tədbirləri
Digər dərman vasitələrinə qarşı hiperhəssaslıq nümayiş etdirmiş pasiyentlərə Tosef ehtiyatla təyin olunmalıdır. Digər sefalosporinlərdə olduğu kimi, anamnezində penisillinə qarşı hiperhəssaslığı olan pasiyentlərə sefiksim ehtiyatla verilməlidir, belə ki, penisillinlər və sefalosporinlər arasında qismən çarpaz-allergenliyə dair bəzi hadisələr qeyd olunmuşdur. Xəstələrdə hər iki sinif dərmana ağır reaksiyalar (anafilaksiya daxil olmaqla) qeyd olunmuşdur. Tosef ilə allergik təsir yaranarsa, dərman qəbulu dayandırılmalı və lazım olduqda xəstə müvafiq vasitələrlə müalicə edilməlidir.
Tosef kəskin böyrək funksiyası pozulmuş xəstələrə (kreatinin klirensi <10 ml/dəq/1,73 m2) ehtiyatla təyin olunmalıdır.
Ağır dəri əlavə təsirləri
Sefiksim qəbul edən bəzi xəstələrdə toksiki epidermal nekroliz və Stivens-Conson sindromu kimi ağır dəri mənfi reaksiyaları bildirilmişdir. Ağır dəri əlavə təsirləri baş verdikdə, sefiksim qəbulu dayandırılmalı və müvafiq terapiya və/və ya tədbirlər görülməlidir.
Tosef-dən uzun müddətli istifadə qeyri-həssas orqanizmlərin həddən artıq çoxalması ilə nəticələnə bilər.
Geniş spektrli antibiotiklərlə müalicə yoğun bağırsağın normal florasını pozur və Clostridium-un həddən artıq çoxalmasına şərait yaradır. Tədqiqatlar göstərir ki, Clostridium difficile tərəfindən istehsal olunan toksin antibiotik-əlaqəli diareyanın ilkin səbəbidir. İstifadə zamanı ağır ishal müşahidə olunarsa, preparatın qəbulu dayandırılmalıdır.
Psevdomembranoz kolitin idarə edilməsinə siqmoidoskopiya, müvafiq bakterioloji tədqiqatlar, maye, elektrolit və zülal əlavələri daxil edilməlidir. Dərmanın qəbulu dayandırıldıqdan sonra kolit yaxşılaşmırsa və ya simptomlar ağırlaşarsa, C. difficile tərəfindən istehsal olunan antibiotik-əlaqəli psevdomembranoz kolit üçün seçim preparatı daxilə qəbul edilən vankomisin olmalıdır. Kolitin digər səbəbləri istisna edilməlidir.
Orta otit suspenziya ilə müalicə edilməlidir. Orta otitin klinik sınaqları suspenziya ilə aparılıb və suspenziya eyni dozada tətbiq edildikdə tabletə nisbətən qanda daha yüksək səviyyələri qeyd olunmuşdur.
Hər 5 ml Tosef-in tərkibində 2511,9 mq saxaroza var. Fruktozaya qarşı dözümsüzlüyü, qlükoza-qalaktoza malabsorbsiyası və ya saxaroza-izomaltaza çatışmazlığı kimi nadir irsi problemləri olan xəstələr bu dərmanı qəbul etməməlidirlər.
Digər dərman vasitələri ilə qarşılıqlı təsiri
Sefalosporin istifadəsi bəzi laborator sınaqların nəticələrini dəyişə bilər. Benedikt, Fehlinq və Klinitest sınaqları yanlış müsbət nəticələr verə bilər.
Yanaşı dərman istifadə olunduğu halda müalicə həkimi ilə məsləhətləşmək lazımdır.
Probenesid sefiksim konsentrasiyasını yüksəldir.
Sefiksim karbamazepin səviyyələrini yüksəldir.
Qida sefiksimin absorbsiyasını ləngidə bilir.
Digər sefalosporinlərdə olduğu kimi, bəzi pasiyentlərdə protrombin vaxtının yüksəlməsi qeyd olunmuşdur. Antikoaqulyant terapiya qəbul edən pasiyentlərdə bu səbəbdən diqqətli olmaq gərəkdir.
Xüsusi populyasiyalara dair əlavə məlumat
Xüsusi populyasiyalara dair məlumat yoxdur.
Pediatrik populyasiya
Pediatrik populyasiyaya dair məlumat yoxdur.
Hamiləlik və laktasiya dövründə istifadəsi
Hamiləlik kateqoriyası B
Nəslartırma potensialına malik qadınlarda istifadəsi zamanı ehtiyatlı olmaq lazımdır. Oral kontraseptivlər ilə qarşılıqlı təsirinə dair məlumat yoxdur.
Hamiləlik
Hamilə qadınlarda adekvat və yaxşı-nəzarətli tədqiqatlar aparılmayıb.
Heyvanlarda aparılan tədqiqatlar hamiləliyə, embrional/fetal inkişafa, doğuşa və ya postnatal inkişafa birbaşa və ya dolayı zərərli təsirlərini nümayiş etdirmir.
Hamilə qadınlara təyin olunduqda ehtiyatlı olmaq məsləhət görülür. Sefiksim plasentar baryerdən keçir; göbək ciyəsində qandakı konsentrasiya ananın zərdab konsentrasiyasının 1/6-1/2 hissəsini təşkil edir.
Laktasiya
Sefiksim ana südündə aşkar olunmur. Buna baxmayaraq, kifayət qədər klinik məlumatlar olmadığı üçün südverən analarda sefiksim təyin olunmamalıdır.
Fertillik
Eksperimental tədqiqatlarda embriotoksik təsirlər aşkar olunmayıb.
Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Sefiksimin nəqliyyat vasitələrini və mexanizmləri idarə etmək qabiliyyətinə birbaşa mənfi təsirini göstərən heç bir məlumat yoxdur. Bununla belə, əgər əsas xəstəlik və ya sefiksimin bəzi arzuolunmaz təsirləri (məsələn, mədə-bağırsaq traktının pozğunluqları) nəqliyyat vasitələrini və mexanizmləri idarə etmək qabiliyyətinə təsir göstərə bilər.
İstifadə qaydası və dozası
Dozalanma/istifadə müddəti və qəbul sayı
Tosef daxilə qəbul edilir.
Böyüklər və 12 yaşdan yuxarı uşaqlar üçün gündəlik dozalanma
Böyüklər üçün tövsiyə olunan gündəlik doza 400 mq birdəfəlik doza şəklində və ya hər biri 200 mq olmaqla ikiyə bölünmüş şəkildə qəbul edilir. Tosef acqarına və ya yeməkdən sonra qəbul edilə bilər.
400 mq birdəfəlik doza ağırlaşmamış süzənək infeksiyasında istifadə oluna bilər.
Streptokok mənşəli tonzillofaringitin müalicəsi 10 gün davam edir.
Böyüklər buraxılış forması (dozası) böyüklərə uyğun hesab edilən tövsiyə olunan dozalardan istifadə etməlidirlər. Oral suspenziya və saşe formaları bərk qidaların udulmasında çətinlik çəkən pasiyentlərdə istifadə oluna bilər.
Pediatrik pasiyentlər (12 yaş və daha kiçik)
Tövsiyə olunan doza 8 mq/kq ümumi gündəlik. Klinik istifadə zamanı, birdəfəlik doza gündə 8 mq/kq və ya 8 mq/kq gündəlik doza 4 mq/kq olmaqla iki dozaya bölünməklə qəbul edilməsi tövsiyə olunur.
Bədən çəkisi (kq) |
Gündəlik doza (mq) |
Gündəlik doza (ml) |
5-7,5 |
50 |
2,5 |
7,6-10 |
80 |
4 |
10,1-12,5 |
100 |
5 |
12,6-20,5 |
150 |
7,5 |
20,6-28 |
200 |
10 |
28,1-33 |
250 |
12,5 |
33,1-40 |
300 |
15 |
40,1-45 |
350 |
17,5 |
45,1 və yuxarı |
400 |
20 |
*Tövsiyə olunan dozanı təmin etmək üçün hər ml üçün müəyyən ölçü cihazı (məsələn, şpris) tələb olunur.
İstifadə qaydası
Daxilə qəbul edilir.
Tosef suspenziyasının hazırlanması:
Tosef hazırlanması üçün aşağıdakı addımları yerinə yetirin.
Tozu ümumi boşaltmaq üçün şüşəni yüngülcə silkələyin.
1. Şüşənin üzərindəki işarənin 2/3 hissəsini doldurana qədər tədricən su əlavə edin və qüvvətlə çalxalayın (suspenziya hazırlamaq üçün qaynadılmış və soyudulmuş sudan istifadə edin).
2. Tam həll olunmasına əmin olmaq üçün 5 dəqiqə kənarda saxlayın.
3. Şüşənin üzərindəki işarəyə qədər su əlavə edin (qalan 1/3 hissəsi) və yenidən yaxşıca çalxalayın (suspenziya hazırlamaq üçün qaynadılmış və soyudulmuş sudan istifadə edin).
4. Həkimin tövsiyə etdiyi doza şüşə flakonla birlikdə təmin edilən 5 ml ölçü qaşığından istifadə etməklə xəstəyə verilir.
Hər dozadan əvvəl şüşəni yaxşıca çalxalayın.
İstifadədən sonra dərhal şüşəni möhkəm bağlayın
Hər 5 ml (1 ölçü qaşığı) hazırlanmış suspenziyada 100 mq sefiksim vardır.
Hazırlanmış suspenziya effektivliyini itirmədən 25°C-dən aşağı otaq temperaturunda 14 gün saxlanıla bilər. 14 gündən sonra şüşə flakonda qalan suspenziyadan istifadə etmək olmaz. Soyuducuya qoyulmamalıdır.
Xüsusi populyasiyaya dair əlavə məlumat
Böyrək çatışmazlığı
Böyrək funksiyası əhəmiyyətli dərəcədə pozulmuş pasiyentlərdə doza azaldılmalıdır.
Əgər kreatinin klirensi <20 ml/dəq/1.73 m2 olarsa və ya böyüklər və ya 12 yaşdan yuxarı uşaqlar xroniki ambulator peritoneal dializdədirsə sefiksimin gündəlik dozası 1x200 mq olmalıdır. Hemodializ və ya peritoneal dializ preparatın əhəmiyyətli miqdarda xaric olmasını təmin etmir.
Qaraciyər çatışmazlığı
Dozanın dəyişdirilməsi tələb olunmur.
Pediatrik populyasiya
6 aydan kiçik uşaqlarda sefiksimin təhlükəsizliyi və effektivliyi təsdiq olunmayıb.
Heriatrik populyasiya
Xüsusi xəbərdarlıq yoxdur. Yaşlı xəstələrə böyüklər üçün tövsiyə edilən eyni doza verilə bilər.
Əlavə təsirləri
Mənfi təsirlər bütün dərmanlarda olduğu kimi qeyd oluna bilər. Sefalosporinlərlə bu təsirlər adətən mədə-bağırsaq pozğunluqları ilə məhdudlaşır və nadir hallarda hiperhəssaslıq reaksiyaları baş verə bilər. Əvvəllər hiperhəssaslıq reaksiyaları və ya allergiya, allergik qızdırma, övrə və allergik astması olan insanlarda belə bir təsirin başvermə ehtimalı daha yüksəkdir.
İkiqat kor klinik sınaqlarda daha çox plasebo ilə bildirilən və səbəb əlaqəsi üçün mövcud məlumatların qiymətləndirilməsi nəticəsində sefiksim terapiyası ilə əlaqəli olma ehtimalı ən az olan mənfi hadisələr aşağıdakı təsnifatdan istifadə etməklə aşağıda təqdim olunur:
çox tez-tez (≥1/10), tez-tez (≥1/100 <1/10), az-az (≥1/1000 <1/100), nadir (≥1/10000 <1/1000), çox nadir (<1/10000), məlum deyil (əldə olan məlumatlara görə tezliyinin qiymətləndirilməsi mümkün deyil).
İnfeksiya və invaziyalar
Məlum deyil: psevdomembranoz kolit
Qan və limfatik sistem pozğunluqları
Nadir: hemoqramda dəyişiklik (leykopeniya, aqranulositoz, pansitopeniya, trombositopeniya, eozinofiliya)
Çox nadir: qanın laxtalanma pozğunluqları
İmmun sistem pozğunluqları
Nadir: övrə və ya angioödem. Müalicənin dayandırılmasından sonra bu reaksiyalar adətən yox olur. Multiformalı eritema, Stivens-Conson sindromu və toksik epidermal nekroliz həmçinin nadirən müşahidə edilmişdir. Hiperhəssaslıq reaksiyaları allergik dəri reaksiyalarından anafilaktik şoka qədər dəyişə bilər (məs., üzdə şişkinlik, dilin ödemi, tənəffüs yolunun daralması ilə müşayiət olunan daxili qırtlağın ödemi, taxikardiya, təngnəfəslik, qan təzyiqinin enməsi, hətta şoka qədər gətirə bilər).
Çox nadir: dərman qızdırması, zərdab xəstəliyinə bənzər reaksiya, hemolitik anemiya, interstisial nefrit.
Sinir sistemi pozğunluqları
Nadir: başhərlənmə, başağrısı
Çox nadir: keçici hiperaktivlik, qıcolmaya meylilik
Tənəffüs, döş qəfəsi və divararalığı pozğunluqları
Məlum deyil: təngnəfəslik
Mədə-bağırsaq pozğunluqları
Çox tez-tez: mədə dolğunluğu hissi, ürəkbulanma, qusma, iştahanın itməsi və köp
Tez-tez: yumşaq nəcis və ya diareya
Çox nadir: antibiotik-əlaqəli kolit (məs., psevdomembranoz kolit), rezistent bakteriya və ya Blastomyces səbəbindən superinfeksiyalar
Hepatobiliar pozğunluqlar
Nadir: zərdabda qaraciyər fermentlərinin (transaminazaların, qələvi fosfatazanın) yüksəlməsi
Çox nadir: hepatit, xolestatik hepatit
Dəri və dərialtı toxuma pozğunluqları
Az-az: dəri səpgisi (ekzantema, eritema, multiformalı qabarıq eritema və tək-tək hallarda Layel sindromu), qaşınma, selikli qişaların iltihabı
Böyrək və sidik yolları pozğunluqları
Nadir: zərdabda kreatinin və sidik cövhəri konsentrasiyalarının yüksəlməsi
Ümumi pozğunluqlar və istifadə yerində vəziyyət
Məlum deyil: genital qaşınma və vaginit.
Şübhəli əlavə təsirlər barədə məlumatların bildirilməsi
Dərman preparatı qeydiyyata alındıqdan sonra ehtimal edilən şübhəli əlavə təsirlər barədə məlumatların bildirilməsi vacibdir. Bu, dərman preparatının fayda/risk balansına davamlı nəzarət etməyə imkan yaradır. Pasiyentdə dərman vasitəsinə ciddi əlavə təsirin aşkar olunması və ya bu bölmədə təsvir olunmamış yeni əlavə təsirin yaranması zaman Milli Farmakoloji Nəzarət sistemi ilə müvafiq olaraq xəbər verməyinizi xahiş edirik.
Analitik Ekspertiza Mərkəzi Farmakonəzarət şöbəsi AZ1065, Azərbaycan Respublikası; Bakı şəh., C.Cabbarlı küç., 34.
Faks: (+99412) 596-07-16.
Tel.: (+99412) 596-05-20/daxili 169.
Qaynar xətt (+99412) 596-07-12.
Mob.Tel.: (+99450) 246-93-84.
Elektron poçt : [email protected]
Doza həddinin aşılması
Dəqiq intoksikasiya halları məlum deyil.
Müalicə zamanı və ya müalicədən sonra davamlı ağır ishal hallarında psevdomembranoz kolit nəzərdən keçirilməlidir. Müalicəni dayandırın və müvafiq müalicəyə başlayın (məsələn, vankomisin daxilə 4x250 mq). Bağırsaqların peristaltikasını ləngidən dərmanlar əks göstərişdir. Anafilaktik şok zamanı şokun ilk əlamətləri görünən kimi təcili tədbirlər görülməlidir.
Anafilaktik şokun müalicəsi: ümumi təxirəsalınmaz tədbirlərə əlavə olaraq, tənəffüs yollarının keçiriciliyi təmin olunmalıdır.
Təcili yardım üçün epinefrin antihistaminlər və qlükokortikoidlər (prednizolon) ilə birgə istifadə olunmalıdır.
Süni tənəffüs, oksigen inhalyasiyası, kalsium yeridilməsi də nəzərə alınmalıdır. Xəstələr çox diqqətlə izlənilməlidir.
Sefiksim hemodializ və ya peritoneal dializ vasitəsilə əhəmiyyətli miqdarda qan dövranından xaric edilmir.
Buraxılış forması
Oral suspenziya hazırlamaq üçün toz YSPE qapaqlı, kəhrəba rəngli, həcmi 100 ml olan şüşə flakonda (hazır suspenziya 50 ml). 1 flakon propilen şəffaf ölçü qaşığı və içlik vərəqə ilə birlikdə karton qutuya qablaşdırılır.
Saxlanma şəraiti
25°C-dən yüksək olmayan temperaturda, quru toz otaq temperaturunda və uşaqların əli çatmayan yerdə saxlamaq lazımdır.
Hazırlanmış suspenziya otaq temperaturunda, 25°C-dən yüksək olmayan temperaturda 14 gün saxlanıla və istifadə oluna bilər.
Yararlılıq müddəti
2 il.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Resept əsasında buraxılır
İstehsalçı
Deva Holding A.Ş., Turkey.
Çerkezköy Organize Sanayi Bölgesi, Karaağaç Mah. Atatürk Cad., No.: 32 Kapaklı-Tekirdağ, Turkey.
Qeydiyyat vəsiqəsinin sahibi
Deva Holding A.Ş., Turkey.