L-LİZİN ESSİNAT
L-LİZİN ESSİNAT inyeksiya üçün məhlul
L-LYSINE AESCINAT®
Beynəlxalq patentləşdirilməmiş adı: L-Lysine Aescinate
Tərkibi
Təsiredici maddə: 1 ml məhlulun tərkibində, 100% quru maddə hesabı ilə, 1,0 mq 2,6-
diaminoheksan turşusunun essin duzu vardır.
Köməkçi maddələr: 96 %-li etanol, propilenqlikol, inyeksiya üçün su.
Təsviri
Şəffaf, rəngsiz mayedir.
Farmakoterapevtik qrupu
Vazoprotektorlar. Kapillyarları stabilləşdirən preparatlar. Kapillyarları stabilləşdirən digər preparatlar.
ATC kodu: С05СХ.
Farmakoloji xüsusiyyətləri
Farmakodinamikası
Preparat iltihabəleyhinə, ödeməleyhinə və ağrıkəsici təsirlərə malikdir. Essin lizosomal hidrolazaların aktivliyini aşağı salır ki, bu da kapillyarların divarlarında və onları əhatə edən birləşdirici toxumada mukopolisaxaridlərin parçalanmasının qarşısını alır və beləliklə, yüksəlmiş damar-toxuma keçiriciliyini normalaşdırır və ekssudatəleyhinə (ödeməleyhinə), iltihabəleyhinə və ağrıkəsici təsir göstərir. Preparat damar tonusunu yüksəldir, mülayim immunokorreksiyaedici və hipoqlikemik effektlərin meydana çıxmasına səbəb olur.
Farmakokinetikası
Öyrənilməyib.
İstifadəsinə göstərişlər
Postravmatik və əməliyyatdan sonra meydana çıxan yumşaq toxumaların müxtəlif lokalizasiyalı ödemi;
Travmatik və əməliyyatdan sonra meydana çıxan baş beyin və onurğa beyin ödemləri;
Ödemlə müşayiət olunan xroniki beyin qan dövranı pozğunluqları.
Əks göstərişlər
• 2,6-diaminoheksan turşusunun essin duzuna və/və ya preparatın tərkibində olan hər hansı digər komponentlərə qarşı yüksək həssaslıq;
• qeyri-stabil hemodinamika ilə müşayiət olunan qanaxmanın aktiv davam etməsi;
• böyrək funksiyalarının ağır dərəcəli pozğunluqları;
• qaraciyər funksiyalarının ağır dərəcəli pozğunluqları;
• hamiləlik və laktasiya dövrü;
Uşaqlar
18 yaşa qədər uşaqlarda və yeniyetmələrdə preparatın istifadəsi əks göstərişdir.
Xüsusi göstərişlər və ehtiyat tədbirləri
Preparatdan istifadə etdikdə, hepatoxolesistitdən əziyyət çəkən bəzi pasiyentlərdə transaminazaların aktivliyinin və bilirubin (düz fraksiyasının) səviyyələrinin qısamüddətli yüksəlməsi müşahidə oluna bilər ki, bu vəziyyət də pasiyent üçün təhlükəli deyil və preparatın istifadəsinin dayandırılmasını tələb etmir.
Göstərilən dərman preparatının 1 ampulunun içərisində 0,9-dan 1,1 qrama qədər etanol (alkoqol) vardır. Alkoqolizmdən əziyyət çəkən pasiyentlərdə preparatın istifadəsi zərərli ola bilər.
Preparatı uşaqlara, qaraciyər xəstəliklərindən və epilepsiyadan əziyyət çəkən pasiyentlərə təyin etdikdə, ehtiyatlı olmaq lazımdır.
Digər dərman maddələri ilə qarşılıqlı təsiri
L-lizin essinat ilə müalicə aparıldıqda, müvafiq göstərişlər olduğu halda digər dərman preparatlarının (iltihabəleyhinə, analgetik, mikrobəleyhinə) təyin olması mümkündür.
Nefrotoksikliyin yüksəlməsi ehtimalını nəzərə alaraq, preparatı aminoqlikozidlərlə eyni zamanda istifadə etmək olmaz.
L-lizin essinatın təyin olunmasından əvvəl, antikoaqulyantların istifadəsi ilə uzunmüddətli müalicə aparıldıqda və ya L-lizin essinatın və antikoaqulyantların eyni zamanda istifadəsi üçün zərurət yarandığı halda, sonuncuların dozalarının korreksiyasını aparmaq (dozaları aşağı salmaq) və protrombin indeksinə nəzarət etmək lazımdır.
Sefalosporinlər sırasından olan antibiotiklərlə eyni zamanda istifadə edildikdə, essinin qan plazmasının zülalları ilə birləşməsi çətinləşir ki, bu da qanda sərbəst essinin konsentrasiyasının yüksəlməsinə və preparatın əlavə effektlərinin inkişaf etmə riskinin meydana çıxmasına səbəb ola bilər.
Preparatın tərkibində 96%-li etil spirti var. Bu səbəblə, etil spirti ilə digər dərman vasitələrinin mümkün qarşılıqlı təsirini nəzərə almaq lazımdır.
Hamiləlik və laktasiya dövründə istifadəsi
Hamiləlik və ya laktasiya dövründə preparatın istifadəsi əks göstərişdir.
Müalicə müddətində ana südü ilə qidalanmanı dayandırmaq lazımdır.
Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Hal-hazırda preparatın nəqliyyat vasitəsini və ya digər potensial təhlükəli mexanizmləri idarəetmə qabiliyyətinə təsiri barədə heç bir məlumat yoxdur; lakin, preparatdan istifadə etdikdə, sinir sistemində meydana çıxan əlavə reaksiyaların inkişaf etməsi ehtimalını nəzərə almaq lazımdır.
İstifadə qaydası və dozası
Preparat vena daxilinə və ya damcı üsulu ilə vena daxilinə yeritmək üçün nəzərdə tutulmuşdur.
Preparatın arteriya daxilinə yeridilməsinə yol vermək olmaz!
Tövsiyə olunan birdəfəlik dozanı 0,9 %-li natrium xlorid məhlulu ilə 15-100 ml həcmə qədər durulaşdırdıqdan sonra, preparatı infuziya şəklində tədricən vena daxilinə yeritmək tövsiyə olunur.
L-lizin essinat preparatının böyüklər üçün maksimal sutkalıq dozası – 25 ml (5 ampul) təşkil edir.
Preparatın tövsiyə olunan sutkalıq dozaları
Böyüklər üçün
L-lizin essinat preparatının tövsiyə olunan sutkalıq dozası – 5-10 ml (1-2 ampul) təşkil edir.
Pasiyentin həyatı üçün təhlükəli olan vəziyyətlərdə, sutkalıq dozanı 20 ml-ə qədər artırmaq və bu dozanı 2 dəfəyə yeritmək lazımdır; müalicə kursu 8 sutkaya qədər davam etdirilə bilər.
Müalicə kursunun davametmə müddəti – pasiyentin vəziyyətindən və müalicənin effektivliyindən asılı olaraq, 2 gündən 8 günə qədər təşkil edir.
Əlavə təsirləri
Essinə qarşı fərdi yüksək həssaslıq qeyd olunduqda, müxtəlif pasiyentlərdə aşağıda göstərilən əlavə reaksiyalar müşahidə oluna bilər.
Allergik reaksiyalar: dəri üzərində səpgilər (papullyoz, petexial, eritematoz), qaşınma, dərinin hiperemiyası, hipertermiya, övrə, tək-tək hallarda – Kvinke ödemi, anafilaktik şok.
Mərkəzi və periferik sinir sistemində baş verən pozğunluqlar: baş ağrısı, başgicəllənmə, tremor, paresteziyalar, tək-tək hallarda – səndələyən yeriş, müvazinətin pozulması, şüurun qısamüddətli itməsi.
Qaraciyərdə və hepatobiliar sistemdə baş verən pozğunluqlar: transaminazaların və bilirubinin səviyyələrinin yüksəlməsi.
Mədə-bağırsaq traktında baş verən pozğunluqlar: ürəkbulanma, tək-tək hallarda – qusma, diareya, qarın nahiyəsində ağrı.
Ürək-damar sistemində baş verən pozğunluqlar: arterial hipotenziya, arterial hipertenziya, taxikardiya, döş qəfəsində ağrı.
Tənəffüs orqanlarında baş verən pozğunluqlar: tək-tək hallarda – hava çatışmazlığı hissi, təngnəfəslik, bronxoobstruksiya, quru öskürək.
Yerli reaksiyalar: preparat venaya yeridildikdə, vena gedişi boyu yanğı hissi, flebit, yeridilmə nahiyəsində ağrı və ödem.
Digər əlavə reaksiyalar: ümumi zəiflik, titrəmə, istilik hissi, bel nahiyəsində ağrı, tər ifrazının yüksəlməsi.
Doza həddinin aşılması
Simptomları: istilik hissi, taxikardiya, menorragiya, ürəkbulanma, qıcqırma, epiqastral nahiyədə ağrı.
Müalicəsi: simptomatik müalicənin təyin olunması.
Buraxılış forması
5 ml məhlul, ampulda. 5 ampul, blisterdə. 2 blister, içlik vərəqə ilə birlikdə karton qutuya qablaşdırılır.
Saxlanma şəraiti
25°C-dən yuxarı olmayan temperaturda, orijinal qablaşmasında və uşaqların əli çatmayan yerdə saxlamaq lazımdır.
Yararlılıq müddəti
2 il.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Resept əsasında buraxılır.
İstehsalçı/Qeydiyyat vəsiqəsinin sahibi
“Haliçfarm” İSC.
Ukrayna, 79024, Lvov şəh., Oprışkovskaya küç., 6/8.